E VIMOS ESTRELAS!!

 A Noite de Estrelas de 2021, que anunciabamos máis abaixo, foi todo un éxito de afluencia de xente e poidemos superar o aforo permitido, 100 persoas, porque a actividade desenvolveuse totalmente no exterior.

Despois dun fermoso día de Veraniño de San Martiño, o ceo cubriuse de nubes ao anoitecer, polo que o astrónomo que dirixía a actividade, Pedro Pablo Campo, decidiu comezar directamente coa observación. Mentres agardábamos a nosa quenda no telescopio, Pedro Pablo explicounos cousas relacionadas co que iamos ver: Xúpiter e tres dos seus satélites, Saturno, a Lúa, Albireo, unha estrela dobre, e as Pléiades. A medida que avanzaba a noite, o ceo foi despexando e a observación mellorou moito. Avistamos tamén moitas constelacións a simple vista.

O público maioritario foron rapazas e rapaces do instituto e dos colexios que acudiron ao centro coas súas familias. Descubrimos entre eles un grupiño de auténticos astrónomos amateurs que sabían distinguir moitas constelacións e que fixeron preguntas moi interesnates a Pedro Pablo Campo.

Deixamos aquí fotografías do evento, cedidas por xentileza de Rodrigo Vázquez, de Turismo Melide.

NOITE DE ESTRELAS

O club de ciencias, do que forma parte activa o departamento de grego, como non podería ser de outro xeito, organiza esta noite unha actividade de observación de estrelas, coa colaboración do OARMA (Observatorio Astronómico Ramón María Aller) da USC. Esta actividade xa se realizou en ocasións anteriores e está aberta a calquera persoa da Terra de Melide que quera achegarse. Con ela inauguramos as actividades estraescolares do curso 21-22 e tentamos recuperar un pouco o ritmo anterior a pandemia (crucemos os dedos para que sexa posible unha relativa normalidade).

Por que nos interesan tanto as estrelas? Á parte do pracer de contemplalas, están estreitamente ligadas á mitoloxía clásica. Bota unha ollada.

RECOLLEMOS UN PREMIO!

O pasado martes 22 de xuño un pequeno grupo de alumnado de 3º de ESO acudimos á Facultade de Filoloxía a recoller un pequeno premio, un accésit do Concurso A máscara que inspira, dentro da modalidade de podcast, polo noso programa de radio Hécuba, a raíña do Ilión, do que dábamos noticia máis abaixo.

No acto fixéronse tamén entrega dos premios do Concurso Odisea e da VI Olimpíada de tradución, concursos nos que tamén participou o IES de Melide. Durante o acto poidemos ver e escoitar os outros traballos premiados en todas as modalidades e disfrutar da súa calidade.

No pouco tempo que nos quedou libre, dimos un pequeno paseo pola zona monumental, facendo un pequeno roteiro mitolóxico e disfrutando das vistas da catedral sen andamios e coas súas fachadas limpas e restauradas. 

Foi unha pequena viaxe que nos resultou moi apeticible nun ano de "sequía" de actividade extraescolares.

FIN DE CURSO NO MUSEO TERRA DE MELIDE

 

O alumnado de 3º de Cultura Clásica rematou o curso este mércores 16 cunha visita ao Museo Terra de Melide. Nestas dous últimas semanas no Museo houbo unha actividade frenética, con visitas de escolares todos os días, e non é de estrañar, non só porque nel gardemos os nosos tesouros, o patrimonio da Terra de Melide, senón tamén porque a amabilidade e o bo facer de Cristina convidan a a elo.

O noso percorrido foi rápido porque non tiñamos moito tempo. Centrámonos na época castrexa e na romanización, que era o que máis nos interesaba. Así vimos bifaces, puntas de lanza, moitos pondera ou pondus e fusaiolas, pezas singulares como un protector de arqueiro o unha pequena ara de Mercurio. Á vista de todos os castros da nosa comarca, reparamos unha vez na inmensa riqueza arqueolóxica da terra de Melide.

Rematamos cunha rápida ollada ao telar tradicional que está na última planta, que nos recordou bastante ao telar de Penélope que o día anterior nos caeu no exame, nunha famosa representación en cerámica. Despedímonos recitando o fermoso poema de J. M. Díaz Castro: 

Penélope

Un paso adiante i outro atrás, Galiza, 
i a tea dos teus sonos non se move. 
A espranza nos teus ollos se esperguiza.  
Aran os bois  e chove.

Un bruar de navíos moi lonxanos  
che estrolla o sono mol como unha uva.
Pro ti envólveste en sabas de mil anos,  
i en sonos volves a escoitar a chuva.

Traguerán os camiños algún día
a xente que levaron. Deus é o mesmo.
Suco vai, suco vén, Xesús María!,
e toda a cousa ha de pagar seu desmo.   

Desorballando os prados coma sono,  
o Tempo vai de Parga a Pastoriza.
Vaise enterrando, suco a suco, o Outono.
Un paso adiante i outro atrás, Galiza!

VI OLIMPÍADA DE TRADUCIÓN DE TEXTOS CLÁSICOS

 Tal como anunciabamos máis abaixo, esta semana participamos na VI Olimpíada de tradución de textos clásicos, organizada pola Sección Galega da SEEC. Os únicos que se animaron foron Pablo Quintela e Iago García Carregal, de 2º C de BAC.

Comezamos ás 16.00 h. coa proba de grego. Tiñamos para elexir un texto de Xenofonte, do libro Ι das Helénicas e un texo de Platón, da Apoloxía de Sócrates. Como era de agardar, tanto Pablo como Iago escolleron Xenofonte, pois foi o autor que traballamos na clase. O texto non era nada fácil, unha parte del estaba incluída na selecta de textos obxecto de ABAU e para moitos profesores era o texto máis complexo dos trinta e tres de Xenofonte. Certo que a parte complicada non entrou, porque era dun nivel moi superior a 2º de BAC. 

A proba de latín comezou ás 18.00, media hora despois de que rematase a de grego. A esta proba presentáronse máis alumnas e alumnos. Os textos a elixir eran de Eutropio e Fedro. Iago e Pablo escolleron Eutropio, un texto sinxelo que falaba do emperador Domiciano e que ademais estaba incluído na selecta de textos de latín para ABAU.

Esta proba foi un entrenamento estupendo para selectividade. A pesares de que foi unha tarde de traballo, pasámolo moi ben vendo a outros compañeiros e visitando a facultade de filoloxía donde algunhas e algúns dos participantes nesta olimpíada comezarán os seus estudos o curso que vén. Como detalle da xornada, SEEC Galicia agasallounos cunhas máscaras serigrafiadas con Eu 💓 Clásicas. Oxalá poidamos deixar de usalas pronto!

TÁBOA PERÍODICA

 O departamento de grego xunto co alumnado de grego 1º de BAC formaron parte do Club de Ciencias

durante este curso e o pasado. Estamos no club de ciencias porque pensamos que o saber non se divide en ciencias e letras e precisamos de todo para a nosa formación.

Cremos no traballo interdisciplinar e pensamos que dende a nosa materia, grego, podemos aportar cousas interesantes en calquera campo de traballo. Na confección desta táboa periódica partiparon os departamentos de física e química, matemáticas, bioloxía e xeoloxía, plástica, inglés e grego.

O alumnado de grego de 1º de BAC encargouse da etimoloxía de todos os elementos. Moitos dos 118 elementos actuais teñen nomes relacionados co latín, o grego ou as mitoloxías clásica e nórdica. Estivemos traballando durante o primeiro trimestre e para nós foi de moita ulitilidade  a táboa periódica interactiva realizada polo departamento de Física e Química e alumnado do IES de Melide e Guía dos elementos químicos, historia, propiedades e aplicacións. Manuel Rafael Bermejo Patiño, Ana Mª González Noya, Marcelino Maneiro Maneiro, Xunta de Galicia 2018.

FACEMOS RADIO NA BIBLIO

A semana pasada o alumnado de 3º de ESO de cultura clásica tivo a sorte de poder facer un curso express de radio no IES de Melide, dentro do programa Radio na Biblio, que impulsa Bibiotecas Escolares. A nosa formación estivo a cargo de Luis Pardo, xornalista da Cadea SER, que nos introduciu no mundo da radio, falándonos dos principais elementos dunha emisón radiofónica e das súas características.

Aínda que no IES de Melide somos pioneiros en radio escolar, tendo en funcionamento a nosa emisora FALAMELIDE dende 1993, unha parte significativa das nosas rapazas e rapaces non coñece este medio e non o escoita salvo contadas excepcións,  cando van no coche cos pais, no bus do transporte escolar, ou  na casa dos avós... como moi ben di Luis Pardo, cando están "secuestrados".

Despois de explicarnos os principais elementos dunha emisión -voz, música, silencio e sons- e compartir con nós ligazóns onde podemos atopar recursos, Luís amosounos diferentes tipos de podcasts onde descubrimos as inmensas posibilidades que ten a radio como medio de comunicación.

Unha parte fundamental no proceso de creación dun podcast ou programa de radio é o guión. Luís explicounos as características dunha mensaxe radiofónica e entre todos fomos capaces de transformar un texto, máis ou menos complexo, nunha noticia de radio.

Por último, acabamos facendo prácticas de locución. Probamos con noticias deportivas e cun guión de radio que tiñamos medio amañado para presentar no concurso A máscara que inspira, organizado pola sección galega da SEEC (Sociedade Española de Estudos Clásicos). Cos bos consellos de Luís, fomos capaces de gravar o podcast Hécuba, a raíña do Ilión, inspirada na traxedia Hécuba de Eurípides, coas voces de Carmen Bitelmal, Xana Castro, Erick Conde e José Luís Otero, de 3º C de ESO, que se revelaron como auténticos artistas. Algunha delas  descubriu unha posible vocación ao facer este programiña. Aquí volo deixamos, a ver que vos parece.

Χαίρετε, παιδιά! ADEUS, RAPACES

 

Despois de despedir ao alumnado do ano pasado, estaba convencida que me ía tocar un tempada de sequía. O curso fora complicado e as cousas non saíron como me gustaría. Estaba resignada a non ter alumnado en 2º de BAC, e tiña como consolo o marabilloso recordo da promoción 2016-2020.

Comezou o curso e en 2º de BAC tiña dous alumnos matriculados, Pablo Quintela Sesar e Iago García Carregal, a miña alegría foi inmensa. Só dous, pero que dous! Pasei todo o curso vendo só as súas miradas por riba da máscara e con iso abondoume. Pablo, sempre atento, cunha mirada cálida e agarimosa, sempre de bo humor e tranquilo, aínda que o forno non estivese para bolos. Iago, coa súa mirada de sorpresa ante cada descubrimento dunha etimoloxía, dun texto...iluminaba a nosa minúscula aula. Ese asombro, ese marabillarse ante o que se aprende, ante a natureza, θαυμάζειν en grego,  foi o que provocou o nacemento da filosofía na Antiga Grecia. Esta alegría por aprender, que eu tiven a sorte de ver neste dous pares de ollos cada día, foron as pilas que me deron a enerxía necesaria para afrontar este ano difícil.

Foi un ano difícil, pero non só pola situación de pandemia que nos atenaza a todos, que non nos permite facer case ningunha das cousas que nos gustan e coas que se aprende de verdade: obradoiros, saídas, viaxes... Paradoxicamente este curso, no que as cousas deberían ser máis fáciles, tivemos que afrontar un traballo maior que o de outros anos, porque os textos propostos pola CIUG para as ABAU de Grego II tiñan un alto nivel de dificultade. Pero Pablo e Iago estiveron a altura e traballaron duro. Aínda nos quedan días de esforzo, presentarémonos a VI Olímpíada de Tradución de Textos Clásicos e despois a ABAU, que Atenea nos axude!

Quédame unha mágoa inmensa de non poder ter feito a nosa viaxe a Grecia, que xa estaba preparada para marzo de 2020 e na que Iago e Pablo ían participar con case 30 rapazas e rapaces máis. Coa declaración do estado de alarma adiámola a setembro, pero a situación sanitaria obrigounos despois a anulala. Cantas veces na clase, explicando calquera cousa, acordábame de todo o que podíamos ter visto en directo! Pero non quero que isto pareza un Diario dun mal ano, como a novela do meu admirado J.M. Coetzee. Con todas as restricións que nos impuxo a pandemia, este foi un curso estupendo grazas a Iago a Pablo. Foi un auténtico pracer ir a clase, facer textos, etimoloxías, explicar literatura... e acabar falando de libros, de películas ou simplemente da vida. Nunca escoitei unha mala palabra, nin sequera apreciei unha mirada cansa. Se algún día Iago ou Pablo fosen profes desexaríalles que tivesen tan bos alumnos como eles mesmos o foron para min.

 Si, xa sei que me repito, que outros anos dixen o mesmo ou parecido, pero é que son unha persona moi afortunada polo feito mesmo de poder repetirme. Só me queda desexarlle esa mesma fortuna, da que eu disfrutei ata agora, a Pablo, Iago e todas as compañeiras e compañeiros da súa promoción.

SEMANA DA POESÍA, RECITAMOS EN GREGO!!

 Coincidindo coa chegada da primavera, celebramos o día da poesía o 21 de marzo. Como no IES de Melide son tantas os e as poetas que nos gustaría ler, fixemos recitais nos recreos de toda esta semana de marzo. Limos poesía en galego, en castelán, en inglés, en portugués, en francés, en rumano, en árabe e como non podía ser menos, en grego antigo.

Aproveitamos que en 2º de BAC estamos a estudar a poesía lírica e así Pablo Quintela recitou en grego antigo o famoso poema de Safo Parece un deus ese home que senta fronte a ti..., soando como fondo a versión musicada deste mesmo poema a cargo do grupo Trinovox. Iago García Carregal recitou o tamén famoso Ítaca de Cavafis en grego moderno, un dos seus poemas favoritos cun fondo musical da coñecida versión deste poema de Luís Llach. Por suposto, despois do recitado en grego viñeron as traducións ao galego de ambos poemas.

O broche de ouro da semana foi o recitado de Os Pinos, o famoso poema de Eduardo Pondal que serviu de letra ao noso himno galego, ao tempo que Lola Corzo o interpretaba en lingua de signos, mentres sonaba a versión interpretada por Lucía Pérez. Pura poesía.

CONCURSO ODISEA 2021

 Unha das poucas actividades que podemos facer nestes tempos de pandemia é o sempre tan agardado e desexado Concurso Odisea, organizado por SEEC Galicia.

Este ano, como non podía ser de outro xeito, o tema foi "A saúde e a enfermidade en Grecia e Roma". Non o traballamos tanto como outros anos porque coincidiu xusto co final da avaliación e cos exames. Aínda así, contamos cunha sinxela presentación nas aulas virtuais, e que agora compartimos, que puido ser de gran axuda a quen soubo consultala e ler. Cometimos erros, que xa veñen de vello, como non ler ben as bases e sobre todo, o erro máis importante é non ler e entender correctamente as preguntas, que son ben retortas e se asemellan bastante aos oráculos de Delfos.

Hoxe foi o día máis duro, comezamos ás 9.30 co preguntón e a iso das 14.00 horas casi todos os grupos conseguiran enviar as súas respostas. Houbo equipos que traballaron moito e fixeron un gran esforzo, que será recompensado na nota da 3ª avaliación. Agora só nos queda agardar a clasificación, Que os deuses repartan sorte!!

APRENDEMOS O ALFABETO DECORANDO MÁSCARAS

Por fin as nosas máscaras en grego, máis vale tarde... Así é como me gustaría inaugurar este curso, pero o que foi unha idea relámpago converteuse en algo máis laborioso.
O primeiro día levei a clase as máscaras de "Sentidiño" que nos dera a consellería, pero alí non había xeito de pintar nada. Por outra banda, eran máscaras dun só uso, que xa non ían quedar moi alá despois do grafiteo en grego.
Chus Pintor, a nosa modista, fíxonos unhas máscaras con filtro de 25 lavados, en manualidades Creati mercamos os rotus para poder decoralas. O resto do traballo é responsabilidade d@s artistas de 1º de Bac,Diego Enjamio Rouco,Candela Miguélez, Raquel Miguélez, Alba Ramos, Antía Ramos, Noemí Vázquez e María Vázquez Prieto.
Estas máscaras son un produto artesanal producido e fabricado na Terra de Melide.

 

ADEUS Á PROMOCIÓN 2014-2020

Se todos os anos despedir a unha promoción de alumnado que marcha é un momento agridoce, este ano de confinamento o sentimento amargo parece que predomina sobre o doce, pasamos moito tempo sen vernos fisicamente e, de momento, non podemos despedilos como se merecen.
Eu nunca fun amiga de festas de graduación, sempre me pareceron (e me siguen parecendo) un elemento importado dunha cultura allea, como tantas outras festas que non consigo nin quero asimilar. Aínda así, este ano apetecíame acompañalos na súa despedida. Queda pendente, farémola en canto nos deixen!
Parece que me repito todos os anos por estas datas, este curso adiadas por culpa deste terrible virus, e sempre solto un repertorio de gabanzas dos que marchan. É a sorte que teño co alumnado que escolle grego. Pero este curso non quero reducirme aos meus seis alumnos de 2º de BAC, quero despedirme de toda a promoción, porque o noso percorrido nestes seis anos foi moi intenso, cheo de fermosas mercancías nácaras e corais, ámbares e ébanos, e perfumes deliciosos de todo tipo... como di Kavafis no seu poema Ítaca.
Recordo aquelas nenas e nenos, ávidas de lectura, que se apuntaron en 2014 ao club de lectura, un auténtico batallón. Moit@s delas foron alumnas miñas en 3º de ESO. Aquel ano, o 2016-2017, tiven un curso moi numeroso de cultura clásica, cheo de xente entusiasta, fixemos mil actividades. A pouco que dixese, tod@s se apuntaban. Non esquezo aqueles contos mitolóxicos que fixemos no cole nº 3 para os cativos e logo na biblioteca para os nosos rapaces de 1º e 2º de ESO. Eu estaba exultante, a penas fixera nada, todo foi cousa daquela rapazada que tiña recursos para todo e era quen de preparar un espectáculo marabilloso nun tempo récord. Logo concurso Odisea, obradoiros, Ludi, colaboración co Museo Terra de Melide... un sen parar.
Pero o mellor de todo foron as nosas viaxes. En 2018 nove días en Grecia: Atenas, Micenas, Epidauro, Olimpia, Kalávrita, Santorini... alí forxamos o "ritmo Grecia", que en 2019 convertiuse en "ritmo Sicilia" unha viaxe na que tod@s estábamos sintonizados, facendo todo xunt@s, sen cansarnos, cantando a todas horas o "Bella, Ciao". En 2020 lanzamos case en broma un órdago para ir a Berlín nunha ponte. Os profes que organizabamos estabamos convencidos de que non iamos conseguir grupo porque en 2º de BAC a xente está só a estudar... Sorpresa! Estabamos tan desbordados de xente que tivemos que restrinxir a viaxe á alumnado só de 2º de BAC. Viaxamos a Berlín só 15 días antes do confinamento, foi unha fermosa despedida da "vida normal". Con esta xente marabillosa eu iría ao fin do mundo, sen dubidalo, todos os esforzos deste ano, no que organizábamos dúas viaxes de longa duración, pagaron a pena.
E xa para rematar falo da miña aula de 2º de BAC. Que sorte a miña ter clase con eles os venres a 6ª hora, a mellor despedida da semana que podería ter. Nunca tiven unha mala palabra, nin sequera unha mirada desagradable. Paula Cordero, tan madura e desexando aprender máis, Alba Regueiro, absorbendo todo o que escoita e ve e conectando todo rapidamente, Aroa Mosteiro con esa mirada que iluminaba a clase, Carlos sempre ocurrente e feliz, Laura Puga, que conserva todo o agarimo daquela pequena que coñecín en 1º de ESO, Mabel, co seu sorriso tranquilo... Xa volo dixen na clase, se algún día sodes profes, deséxovos alumn@s como vós o fostes para min. Que fortuna tan gande tervos coñecido e percorrer con vós este tramo de viaxe. Feliz viaxe a Ítaca!

POR FIN UNHA TRAXEDIA CLÁSICA EN GALEGO, BRAVO!!

Este ano ao pracer de volver ver teatro clásico en Lugo engadiuse a novidade e a emoción de poder escoitar por vez primeira heroes tráxicos falar na nosa lingua. Non foi sen tempo despois de vinte anos de existencia deste festival de teatro, organizado por SEEC Galicia.
Este soño, poder escoitar a Ifixenia falando galego, non podería cumprirse se non fose pola xenerosidade de Susana Crespo e dos compoñentes do seu grupo de teatro El Ruiseñor.
A posta en escena de Ifixenia en Áulide foi fermosísima, solemne, grandiosa até o punto de ser quen de manter en silencio e recollimento a un auditorio cheo de estudantes de secundaria. Unha Ifixenia coa forza propia da xuventude e da inocencia, unha Clitemnestra desgarrada que loita como unha leoa até o final para salvar a súa filla. Un Agamenón que se debate entre o seu amor filial e a propia ambición, un Aquiles nobre e valiente, pero temeroso da multitude, un vello escravo máis cordo e coherente que os seus amos... todo eles son personaxes característicos de Eurípides, máis humanos, con luces e sombras, con medos e dúbidas.
Que marabilla poder escoitalos na nosa lingua e poder preparar o texto nas aulas coa impecable tradución de Ánxela Vidal Triñáns.
Pola tarde, O Persa de Plauto superou con moito as nosas espectativas. O Persa non é unha das principais obras de Plauto, é unha comedia que nos amosa un mundo do revés onde os escravos actúan como donos e señores, organizan banquetes e dispoñen da facenda do amo ausente.
O bo facer de El Ruiseñor e a magnífica adaptación de Ricardo Martín foron capaces de converter un texto simple, baseado no enredo e no equívoco, nunha comedia redonda e hilarante coa que disfrutamos moito pola tarde.
Pola mañá, antes da representación de Ifixenia, Javier Carreira, Najwa Daki e Iratxe López de Armentia, alumnos de 1º de BAC do IES de Melide que conformaban o equipo Synoris, recolleron o 2º premio do Concurso Odisea na súa fase autónomica, cousa que nos enche de orgullo, como é lóxico.
Ademais de teatro, sempre aproveitamos a nosa visita a Lugo para coñecer o patrimonio romano. Este ano tocoulle á necrópole de San Roque, un recinto arqueolóxico moi interesante no que destaca un impresionante estanque ritual con representación dos deuses exipcios Isis e Amón. Alégranos ver como nestes anos o Concello de Lugo foise esforzando por preservar o seu patrimonio romano e aumentou considerablemente os seus espazos museísticos.
E como sempre, só queda dicir que ao pracer de disfrutar de teatro e patrimonio clásico engádese o de pasar unha xornada acompañados por un alumnado de clásicas e artes escénicas que sabe estar,  disfrutar e valorar toda esta herdanza clásica.

VIAXE A BERLÍN

Este ano os departamentos de latín e grego embarcámonos en dúas viaxes: unha viaxe a Berlín no Entroido para alumnado de 2º de BAC e a xa institucionalizada viaxe a Grecia, na semana anterior a Semana Santa.

Por que Berlín? Pois porque o patrimonio clásico non está só en Grecia ou Italia, senón en moitos países europeos que formaron parte do Imperio Romano ou en países que nos séculos XIX e XX conseguiron levar ao seu territorio inxentes restos arqueolóxicos e coleccións de antigüidades por métodos que, na súa maioría, hoxe calificaríamos como expolio. Tal é o caso de Alemaña, que amosa en museos de Berlin edificios como o Altar de Pérgamo, que non puidemos visitar por estar en reformas, a porta do mercado de Mileto e unha importante colección de antigüidades clásicas entre as que destacamos o Tesouro de Príamo, atopado en Troia polo arqueólogo H. Schliemann e moitas marabillas máis, repartidas entre o Neues Museum, o Altes Museum e Pergamonmuseum.

Pero no só vimos ver antigüidades a Berlín, senón tamén a estudar historia recente, xa que Berlín aínda amosa as súas feridas como escenario do III Reich, da II Guerra Mundial e cidade emblématica da Guerra Fría, co famoso muro que a partiu en dous durante case trinta anos.

Unha viaxe estupenda grazas ao alumnado participante, que na súa maioría viaxou a Sicilia o ano pasado e a Grecia hai dous anos. Con xente como esta, disposta a ver e aprender en todo momento, paga a pena o esforzo de organizar dúas viaxes e quedar sen vacacións de Entroido.

Velaí a nosa guía de viaxe á que lle faltan algunhas cousas importantes.

Aquí van unhas cantas fotografías. Outras podedes velas nesta ligazón, creada por Ander Varela.

 

TRES ANOS SEGUIDOS CLASIFICADOS EN ODISEA!!!!

No IES de Melide estamos a celebrar a nosa boa racha no Concurso Odisea. Esta ano dous equipos conseguiron clasificarse: Synoris, formado por Nawja Daki, Javier Carreira e Iratxe López de Armentia, de 1º de BAC B e o equipo Coraxe, con Iago García e Pablo Quintela, tamén de 1º B. Por tempo Synoris foi ao desempate e conseguiron o segundo posto na clasificación autonómica!!

E son xa tres anos, o pasado o IES de Melide quedou de terceiro e hai dous anos nade menos que o primeiro posto.

Rogamos aos deuses e deusas que @s organizadores non se cansen de seguir traballando para que poidamos seguir desfrutando deste concurso, no que tan ben o pasamos e tanto aprendemos.

Velaí a clasificación dos 16 equipos que participaron no IES Melide, nun total de 243 que participaron en Galicia.

Clasificación dos Grupos que participaron no desempate

Orde	Nome do Grupo	Centro	Localidade	Tempo empregado no desempate	Puntuación Total
2º	SYNORIS	IES DE MELIDE	MELIDE	1 horas, 17 minutos e 26 segundos	105

Clasificación dos Grupos restantes

Orde	Nome do Grupo	Centro	Localidade	Tempo empregado en preguntón	Puntuación Total
7º	CORAXE	IES DE MELIDE	MELIDE	4 horas, 46 minutos e 15 segundos	79
25º	AMANTES DE ZEUS	IES DE MELIDE	MELIDE	3 horas, 40 minutos e 15 segundos	75
26º	OS TITÁNS	IES DE MELIDE	MELIDE	3 horas, 42 minutos e 30 segundos	75
27º	TRES GRATIAE	IES DE MELIDE	MELIDE	3 horas, 44 minutos e 50 segundos	75
41º	CHURIS	IES DE MELIDE	MELIDE	3 horas, 38 minutos e 51 segundos	73
42º	MILLÍXPALAS	IES DE MELIDE	MELIDE	3 horas, 46 minutos e 6 segundos	73
53º	AS TRES GRACIAS	IES DE MELIDE	MELIDE	3 horas, 22 minutos e 32 segundos	71
70º	MOIRAS	IES DE MELIDE	MELIDE	3 horas, 35 minutos e 12 segundos	67
71º	AA MAMÁ	IES DE MELIDE	MELIDE	4 horas, 46 minutos e 22 segundos	67
75º	FANSES EMILIO DEL RÍO	IES DE MELIDE	MELIDE	3 horas, 58 minutos e 13 segundos	66
97º	ATALANTA	IES DE MELIDE	MELIDE	4 horas, 42 minutos e 25 segundos	61
100º	AS DÚAS AFRODITAS	IES DE MELIDE	MELIDE	3 horas, 42 minutos e 38 segundos	60
108º	PÍNDARO	IES DE MELIDE	MELIDE	4 horas, 14 minutos e 24 segundos	58
117º	ESCUDO E ESPADA	IES DE MELIDE	MELIDE	4 horas, 14 minutos e 46 segundos	55
134º	BAKUDEKU HARD	IES DE MELIDE	MELIDE	4 horas, 8 minutos e 3 segundos	45

CONCURSO DE ODISEA

Por fin chega o concurso Odisea, unha das actividades favoritas do alumnado de clásicas do IES de Melide. Este ano toca un tema moi interesante e importante, O deporte en Grecia e Roma. A proximidade cos V LVDI COMPOSTELLANI deixounos pouco tempo para adestrar, pero como boas atletas, nesta semaniña que nos queda faremos un esforzo case olímpico e tenteramos estar a altura.
A ver se este ano tamén a sorte nos acompaña. Comezamos vendo con calma esta presentación.
E non perdas esta interesante conferencia en vídeo sobre Xogos Olímpicos a partir do minuto 8.




Agora toca facer este Kahoot. Ten en conta que algunha pregunta pode ter máis de unha resposta.

V LVDI COMPOSTELLANI

O pasado mércores 22 de xaneiro tivemos a nosa quinta edición dos LVDI COMPOSTELLANI, a gran festa da cultura clásica que, atrevémonos a dicir, está xa ben consolidada na Gallaecia.
Este día acudimos varios centros de secundaria a impartir e recibir obradoiros á facultade de filoloxía da USC que estaba engalanada para a ocasión con mobles de inspiración clásica fabricados polo Ciclo de Madeira do IES de Melide, un mural cun magnífico cortexo de Dioniso realizado polas profesoras Margarita Olivar e Eva Garea, un simpático romano de Xosé Tomás... que nos axudaban a trasladarnos ao mundo antigo. Neste marco clásico un equipo de mozas e mozos do IES de Melide agasallaba aos visitantes con tattos en grego e latín.
 O IES de Melide, ao igual que en anos anteriores, impartiu os obradoiros de danza grega, escritura antiga e moda clásica cun alumnado cada vez máis afianzado e seguro que soubo expor ante outras alumnas e alumnos o que aprendera nas aulas. Este ano o obradoiro de moda contou coa colaboración de Hugo López, modisto e deseñador melidense, alumno de cultura clásica de 4º de ESO, que enriqueceu o noso catálogo cun espectacular traxe de grega minoica e outros deseños máis clásicos que luciron as súas compañeiras e profesoras.
O IES de Elviña estreouse este ano cun brillante obradoiro sobre hixiene e cosmética, onde puidemos ver unha réplica de letrina romana e facer un delicioso perfume. Fernando Lillo, magister maximus do IES de Santo Tomé de Freixido, ensinounos a facer graffiti pompepianos e a combatir como auténticos hoplitas gregos. O alumnado da filoloxía clásica da USC fíxonos xogar como antigos gregos e romanos. Fóra da Facultade, outros grupos de estudantes facían unha xincana de tema clásico pola zona monumental compostelá, guiados pola profesora Ana Suárez, especializada en Historia de Roma.
A media mañá puidiemos disfrutar dun espectáculo excepcional a cargo da Asociación cultural Gallaecia Viva que nos fixo vivir unha loita de gladiadores ao igual que na antiga Roma.
Unha xornada magnífica que nos ensinou a traballar en equipo e aprender divertíndonos.

DESPEDINDO O CURSO CON EMILIO DEL RÍO

Para despedir o curso desta volta decidimos pasar a tarde do mércores 19 de xuño en Compostela, aproveitando que Emilio del Río se achegaba a Compostela para presentar o seu libro Latín Lovers.
Emilio del Río é un coñecido latinista e divulgador que conta cun autentico clubs de fans no IES de Melide. Nas clases de latín de Eva Vilariño en 4º de ESO e, sobre todo, en 1º BAC sempre se dedica un momento da semana para escoitar o seu programa Verba Volant, dentro do espazo No es un día cualquiera, que presenta Pepa Fernández en RNE 1.
Para recibir a Emilio como se merece, as alumnas de 1º de BAC de latín prepararon unha pancarta cunha magnífica caligrafía con letra capitalis rustica -que de algo nos valeron os obradoiros de escritura!- que rezaba: SAPERE AVDE CVM MAGISTRO AEMILIO ("Atrévete a saber co mestre Emilio", para @s que non tedes a sorte de saber latín). A verdade é que a pancarta deu o campanazo e tiraron un montón de fotos. Emilio incluso levouna como recordo. A hora e pico que durou a conferencia pasou voando e despois, nas dedicatorias, Del Río, coa amabilidade e simpatía que o caracterizan, dedicou un tempo máis que xeneroso a tod@s os que acudimos á mesa a pedirlle unha dedicatoria do libro.

Antes da conferencia aproveitamos para coñecer a Sala Númax, un local de promoción cultural que funciona como sala de cine, libraría e laboratorio. Alí pudimos ver Elisa e Marcela, a interesante película de Isabel Coixet baseada na historia real de dúas mulleres que a principios do s. XX se atreveron a ter unha relación amorosa.
Un día redondo na mellor das compañas, o alumnado de humanidades e o noso querido compañeiro Fernando López, profe de madeira que está a punto xa de integrarse no departamento de clásicas, despois de viaxar con nós a Sicila e Grecia, deseñarnos mobles clásicos e un sinfín de cousas máis. Botamos moi en falta a Eva Vilariño, que desgrazadamente non puido acompañarnos nesta tarde e mandámoslle todo o noso agarimo.

Desámosvos un feliz verán e deixamos aquí a ligazón ao último programa de Verba Volant, no que Emilio del Río menciona ao IES de Melide.

VIAXE A SICILIA 2019. POR FIN!!

Cando xa van alá dous meses da nosa fantástica viaxe a Sicilia, publicamos por fin unha selección de fotos. Se o ideal é facer as cousas en fresco e dar noticia inmediata das nosas actividades, nesta ocasión as circunstancias fixeron que tras este paréntese de dous meses volvamos a soborear algo que xa tiñamos esquecido.
É difícil facer síntese: Catania co seu barroco siciliano, unha vila de amplas avenidas e xardíns amable para pasear. O monte Etna, onde Hefesto tiña a súa fragua, nevadísimo. Taormina coa súa espectacular ubicación que permitía que os espectadores do teatro disfrutasen das máis fermosas paisaxes. Siracusa co seu poderoso pasado grego, onde aínda nos parece ver paseando polas súas rúas a Platón, Dión ou Arquímedes. A luxosa Villa del Casale cos seus centos de metros cadrados de mosaicos nun incrible estado de conservación. O Val dos Templos en Girgenti (Agrigento) onde dalgún xeito seguen morando os deuses gregos. Murriale (Monreale) coa súa catedral árabe-normanda que deixa sen respiración. Cifalù (Cefalù), a perla da costa norte, coa súa gran rocha coronado a paisaxe. Palermo, señorial e decandente berce de fenicios, gregos, normandos...

Lugares máxicos na mellor das compañas: Laura Cabo, Paula Cordero, Sara Folgueira, Anita e María Fuciños, Saray, Lara, Zaira, Dolores, Carlota, Elisa, Inés, Lucia Peón, Alberto, Carla, Mabel, Teresa, Sara Sánchez, Carolina, María Valcárcel, Paula Valiño, Xanaia, Marta e Lucía Rizos. Moitas son repetidoras de Grecia, con todas elas pódese ir ao fin do mundo. Elas co seu interese constante, coas súas ganas de aprender, co seu saber estar e as súas calidades humanas fixeron que esta viaxe sexa inesquecible para Fernando López (Ferni), Eva Vilariño e quen suscribe, Susana Losada (Susilosi). Arrivederci, ragazze!

 

OUTRA VEZ TOCA DESPEDIDA

Este ano, se cadra algo antes que os anteriores, despedimos unha vez máis ao alumnado de 2º de BAC. Seis anos xuntos é moito tempo, e sobre todo tempo de grandes cambios. Recordo a aquelas nenas e nenos que empezaron no club de lectura polo 2013, que foron pasando da adolescencia en cultura clásica a (case) idade adulta, polo menos iso é o que podo dicir das miñas alumnas e alumnos de bacharelato. Fago un repaso deste tempo, saídas ao cine, teatro clásico en Lugo, os primeiros Ludi Compostellani que organizamos, canto traballo e canto medo!. O concurso Odisea e ese primeiro premio de Galicia que gañaron Yara, Adrián e Ainhoa, a viaxe a Grecia á que so viñeron uns poucos... Pero o máis importante de todo, a convivencia do día a día nas aulas que me permitiu coñecer mellor a unhas persoas marabillosas que me engaiolaron. Subscribo todo o que di a profe de filosofía, Marga Quintela, e mesmo lle roubo (ou reciclo) a súa frase "seguinde namorando a xente como me namorastes a min".
Yara, que aínda que en 2º de BAC escolleu outras optativas máis axeitadas aos seus futuros estudos, deixoume o recordo dunha mente lúcida e da súa honestidade. Uxía, aquela calada alumna de cultura clásica que se convertiu nunha brillante estudante de 2º de BAC, talvez con vocación filolóxica, coa súa mirada atenta e aguda, e doce como non, para non perderse nada. Marta co seu bo humor, sempre disposta a buscar a distensión do grupo e alegrarnos a clase, igual que Nuria, que neste curso aprendeu a ver a vida con tranquilidade e a disfrutar do momento (carpe diem!), que non está rifado con tomarse as cousas en serio. Ainhoa, sempre preocupándose polos demais, sensible e chea de empatía. Por que será que se convertiu en Santa Rela de Toques? por suposto que Marta está detrás desta beatificación. Adrián, o único rapaz da clase, o noso experto en temas de Historia, aparentemente máis serio, coa súa discreción característica, a súa constancia e boa organización.
Fixestes que as clases de bacharelato fosen unha terapia para min. Se entraba cansada, desanimada, ou enfadada ás veces, cinco pares de ollos atentos e sorrisos serenos facían que me esquecese de todo, que disfrutase do pracer que para min é dar clase de grego. Fostes os meus coelliños de indias, sen a vosa confianza e seguridade non sería quen de experimentar un novo método, seguindo a Santi Carbonell, menos baseado na gramática e máis na intuición, e de cambiar a pronunciación erasmiana pola histórica. Espero con ansia que os resultados das ABAU sexan bos para acabar de testar este cambio metodolóxico.
Pola miña parte, eu só agardo ter estado a vosa altura e ter contribuído un pouco a dotarvos de ferramentas para o futuro, non só para triunfar nos estudos e na vida, senón tamén para ser felices, que é o máis importante e sen dúbida o maior triunfo de todos.
Só me queda desexarvos que a vosa "viaxe a Ítaca" sexa longa, como di o poeta, chea e coñecemento, e que vos enriqueza como vos me enriquecestes a min.